Әлихан Жақсылық. Ақпан-дастан -Алматы: «AR» Баспа үйі, 2025. -104 бет.
   Төл әдебиетіміздің төрінде тұрған һәм балбастауы саналатын тарихи дастандардың маңыздылығы мен құндылығы туралы талқыда аса ауқымды тақырыпты тарқатып айтпай, қысқа қайырып қана, түбегейлі тұжырым жасап, мол мағлұмат беру мүмкін болмаса керек.Қазір қолыңызға тиген «Ақпан-дастан» кітабы жүзжылдықтардың жаңғырығы іспетті: ілкідегі дүр дәуірден жеткен дәстүрлі жырдың жаңа дидары, бүгінгі бейнесі.
Автор атақоныс жайлы һәм тарихи тұлғалар туралы тебірене толғап, бабалар баянын барынша көркем кескіндеп, шынайы да шырайлы бедерлей білген.

Нұршайықов Әзілхан Мәңгілік махаббат жыры. Естеліктер.- Алматы: Атамұра, 2024.-304 бет.
 Қазақстанның халық жазушысы Әзілхан Нұршайықовтың қара сөз және ақ өлеңмен жазылған бұл туындысы поэма тәріздес оқиғаларға толы. Олар бірінен соң бірі оқырманды тартып, тебірентіп, толқытып отырады. Ұлттық тәлім-тәрбиелік мәні зор шығармасын автор өзінің жан жары, әдеби серігі, қазақ халқының тамаша қызы Халимаға арнған.

Жағыпарұлы Жылқыбай Қыз қыран: Хикаяттар мен әңгімелер.-Алматы: «Керемет медина», 2024.-176 бет.
Бұл кітапқа белгілі жазушы-публицист Жылқыбай Жағыпарұлының әңгімелері мен хикаяттары, «Ақмола көтерілісі» атты естелік эссесі енгізілді. Қазақы құнары тілмен жазылған шығармаларда ұлттық және отбасылық құндылықтар сипатталып, үлкендерді құрметтеу, дәстүр-салтты сақтау мәселелері қозғалады. Естелік эсседе автор өз басынан өткен оқиғаларды баяндайды. Кітаптағы барлық туындылар оқырмандарды бейжай қалдырмайды.

Әуезов Мұхтар Қилы зама: тарихи повесть - Қарағанды: «Qasym баспа үйі», 2024. -238 бет.
 М.Әуезовтің «Қилы заман» романында қазақ даласын кеңінен шарпыған 1916 жылғы ұлт-азаттық көтерілістің Жетісу жеріндегі алапат оқиғалары баяндалады. Көрнекті қаламгер саяси ахуалдың шиеленіскен шағында қазақ елінің ар-намысы үшін күрескен ерлердің, би-шешен, батыр, бай, болыс, көнекөз қариялар мен жастардың ой-әрекетін, іс-қимылын суреттейді. Отарлаушы үкіметтің қазаққа ғана емес, басқа да отар халықтарға, тіпті адамзатқа жат саясатын әшкерелеп, адамгершілік-әділеттілік мәселелерін әлеуметтік-қоғамдық ахуалдармен байланыстыра көркем баяндаған.

Жұмабай Асарбаев «Жүректегі жалғыздық». «Литера-А» ЖШС Ақтөбе, 2024ж. -190 бет.
 Неміс әлеуметтанушысы, философ Эрих Фромм «Өзінің жалғыздығын сезіну, ортадан бөлініп қалу, табиғаттың күшіне қарсы келе алмайтынын сезіну оның өмірін тамұққа айналдырады» депті. Мынау өлшеулі ғұмырда неге біз жалғыздықты сезінеміз? Адамдар неге бір-біріне қатігез? Аялап өсірген ұл-қызы бойынан қуаты тайып, қарттыққа қадам басқанда ата- анасына неге безбүйректік танытады? Осындай жан ауыртатын өзекті мәселелер қаламгер-ұстаз Жұмабай Асарбаевтың жаңа жинағының арқауы.

Момышұлы Бауыржан Ұшқан ұя: хикаят -Астана:Фолиант, 2024.-216 бет.
 «Ұшқан ұя» хикаяты-халқымыздың ХХ ғасыр басындағы этнографиялық энциклопедиясы іспетті аса құнды қазына. Шығармаға автордың ес біле бастаған шағынан мектеп табалдырығына аттағанға дейінгі өмірі өзек болған. Жазушы өзінің тұлға ретінде қалыптасуына ұшқан ұясы ықпал еткенін баяндай отырып, отбасы мүшелерін өзіндік бейнелерімен әр қырынан танытқан.«Ұшқан ұя» хикаясы-мемуарлық шығарма ғана емес, қазақтың салт-дәстүрі, ғұрпы, ұстанымы, дүниетанымы әсерлі бейнеленген этнографиялық шығарма.

Есенберлин Ілияс. Көшпенділер. Алмас қылыш. Бірінші кітап.-Алматы: «Мазмұндама баспасы», 2024.-392 бет.
  «Көшпенділер» -Ілияс Есенберлиннің «Алмас қылыш», «Жанталас», «Қаһар» деген үш кітаптан тұратын тарихи туындысы. Бұл трилогияда бес ғасырлық оқиға, яғни ХV-XIX ғасыр аралығындағы Қазақ хандығының кезеңі суреттеледі. Шығарма кейіпкерлері, негізінен, тарихи тұлғалар. Ал баяндалатын оқиғалар тарихи жүйемен дамып, өрбіп отырады. Қазақ халқының келбетін, күшін, тарихын көрсететін бұл туынды баға жетпес асыл қазына екені сөзсіз.

Қаныш және ғылыми майдан: Отбасы хрестоматиясы. С.Керімбай, Ә.Нәби.-Алматы: «Отбасы» Баспа үйі, -2024.-456 бет.
 Кітапта Қаныш Сәтбаевтың болмысы, өмір жолы, ғылым жолындағы жанқиярлық ерліктері экзистенция анализі арқылы талданады. Әсіресе 1946 жылы ашылған Қазақ Ғылым академиясының тарихы мен жетістігі кеңірек баяндалады. Қаныш Сәтбаевтың жанына серік болған ғылыми майдандағы достары-М.Әуезов, Ж.Шаяхметов, Ш.Шөкин, Ш.Есенов, Е.Бөкенов, Е.Ысмайлов, Б.Кенжебаев жайында да мәлімет беріледі.Бұл кітаптың Қаныш Сәтбаевқа арналған басқа кітаптан ерекшелігі-кейіпкердің өмірбаянын толық баяндап шығуды мақсат етпейді. Қаныш Сәтбаевтың кейбір шешімі мен іс-әрекетін экзистенция анализі, онтология, логотерапия, феноменологиялық әдіспен түсіндіреді.

Хилл Наполеон. Байлыққа бастар жол ойдан басталады [ағыл. тіл. ауд. Д. Мәзен]. - Астана: Фолиант, 2024. - 144 бет. - (Әлемдік бестселлер).
 Бұл кітап Наполеон Хиллдің 1937 жылы жарық көрген «Ойлан да байы» атты түпнұсқа еңбегінің синопсисі. Мұнда байлыққа жетелер принциптер, нұсқаулықтар мен мысалдардың ең қа- жеттісі ғана қамтылған. Сондай-ақ ақшаға қатысты 6 негізгі қорқыныш пен оны жеңу жолдары ұсынылады.Кітапта баяндалған 13 принципті түсініп, қолдана бастағанда материалдық байлықтан да жоғары құндылықтарға ие боласыз. Сондықтан қағидаларды өмірде қолдана бастағанда өміріңіз өзгеріп, жан-дүниеңізде үйлесім орнап, ғұмырыңызға жетер байлыққа кенелесіз! Мүмкін емес деймісіз? Байқап көріңіз!

Өмірзақ Мұқай. Көлеңке. Өмірзақ МҰҚАЙ. - Алматы, ЖШС РПБК «Дәуір», 2024. - 272 бет.
   Автордың бұл жинағында үш хикая мен әңгімелері біріктірілген. Өзгермелі уақыт инерциясын оқырман жылдам аңғарады. Ол дегеніңіз, қазақ қоғамындағы диалектиканың деректі айғағы. Кітаптың тілі, баяндау тәсілі көңілге қонымды.

Тоқтаров Рамазан. Абайдың жұмбағы: роман / Рамазан Тоқтаров.- Астана: Фолиант, 2024. - 856 б.- (Сөз-маржан).
  Танымал жазушы Рамазан Тоқтаров өзінің «Абайдың жұмбағы» атты романында ұлы ақынның туғанынан бастап дүниеден өткеніне дейінгі тұтас. бір дәуір панорамасын жасауды мақсат еткен. Романда Абай өмірінің сан салалы қоғамдық, әлеуметтік көріністері кең қамтылып, айшықты көркем тілмен бейнеленген. Автор ұлы Абайдың әдеби бейнесін толымдырақ етіп жеткізу үшін қамтылмай келе жатқан жайттарға, ақын өмірінің әлі ашыл- маған қырларына бойлап, уақыт тасалаған шындыққа бүгінгі заман көк- жиегінен көз жібереді. Романда оның әйгілі тұстастары, қазақтың тұңғыш ғалымы Ш. Уәлиханов пен ғұлама жазушы Ф.М. Достоевскийдің Семей қаласында бас қосқан жылдары, сондай-ақ Абайдың өз ақын шәкірттерін тәрбиелеу бағытында сіңірген ғибратты істері де баяндалады. Қалың оқырман жылы қабылдаған бұл туындыны зерттеушілер жаңа дәуірдегі әдебиетімізге қосылған сүбелі үлес деп таниды. Шынайы суреткердің шеберлігін танытқан шығарманың көркемдік дәрежесі жоғары, тілі бай.

Дәлейұлы Ұларбек. Хат бармайтын қыстақ: әңгімелер, хикаялар, эсселер - Астана: Фолиант, 2024. — 208 б. — (Бүгінгі проза).
  Ұларбек Дәлейұлының бұл кітабында қамсыз балалық шақ, өткен өмір елестері өзгеше стильмен өрнектеледі. 1939-1958 жылдары арасында қытайдың екі билігімен қатар күрескен қазақ көтерілісшілерінің ерлікке толы, аңызға бергісіз хикаялары қазақы қоңыр тілмен баяндалады. Таулы аймақта, киіз үйде көрген таңғы түстей өте шыққан балғын шақтың естеліктері әр тұстан менмұндалайды. Жазушы көш жолында, «Сайтан асу» бойында, шаңды соқпақтардың жиегінде қалған елестер арқылы бүгінгі өмір сұлбасын дәл суреттейді.

Есенберлин Iлияс. Қатерлі өткел.Роман.- Алматы: «Книжный клуб баспасы» ЖШС, 2023.-288 б.
  Ілияс Есенберлиннің «Қатерлі өткел» романының бас қаһарманы, алашордашыл ақын Бүркіт. Роман оқиғасы оның бүкіл ғұмырын қамтиды. Өзінің ұстазы ақын Ақанның қазасына қатты қайғырған Бүркіт кеңес өкіметінің қазақ еліне, қазақ халқына не бере алатынын түсінуге тырысады. Оның бар ойы халықтың болашағы, оның осы уайымын ескі досы Ақан мен танысы Қаражан барынша пайдалануға тырысады. Бірақ олар халықты емес, өз қара бастарының қамын ойлаған жандар. Осы екіжүзділіктері өз түптеріне жетеді. Бүркіт болса нағыз қазақ интеллигенциясының идеясынан ауытқымай, бүкіл ғұмыры мен шығармашылығында өз халқы мен отанына деген адалдығын сақтап қалады. Роман өзіне тиесілі бағасын әлі алмады, өз уақытында Алаш- ордашылар идеясы қандай өзекті болса казіргі уақытта бұл романда көтерілген мәселелер де сондай өзекті.