Мұртаза Шерхан Бесеудің хаты. - Алматы: «Мазмұндама баспасы», 2023. - 208 бет.
  XX ғасырдың басындағы күштеп ұжымдастыру халықты ашаршылыққа ұшыратты. Сталиннің саясатына, Голощекиннің жауыздығына Ғабит Мүсірепов, Мансұр Ғатаулин, Емберген Алтынбеков, Мұташ Дәулетқалиев, Қадыр Қуанышев сынды қазақ зиялылары қарсылық білдіріп, Голощекинге арнап хат жазады. Шерхан Мұртазаның «Бесеудің хаты» атты пьесасы - сол хаттың негізінде жазылған шығарма. Бұл туынды жас ұрпаққа халық қасіретін ұқтырар асыл мұра екені сөзсіз.

Медеу Биғайша. Аламан қыздардың ақырғы шайқасы. Биғайша Медеу. - Алматы: ЖШС РПБК «Дәуір», 2023. - 576 бет.
  Ақын жырлары езінің заманауи ой-тұжырымдарымен елең еткізеді. Жырмен жаратылыстың суретін салу арқылы ой мен түйсік үстемдік кұрады. Сезім тереңдігі баурайды. Ноқтаға басы сыймайтын тағдыр жыр тілінде сөйлейді. Тарихтың тұңғиығынан сүзіліп алынған ақбозатты аламан қыздар бейнесі өлең тілінде тіл қатады. Ақынның ерекшелігі-қазақ қыздарының әлемді таңдандырған жауынгерлік рухын жырлау. Қазіргі поэзияға әкелген соны тақырып. Азаматтық пен Адамгершілікті, нәзіктік пен парасатты катар өрген рухты жырлар пәлсапасы ешкімді бей-жай қалдырмайды.

Ғилымхан Мәрлен. Төбелер стихиясы: өлеңдер, поэмалар, циклдар- Алматы: «Қазақстан Жазушылар одағы» РҚБ, 2024. - 240 б.
  Жинаққа ақынның Ақтөбе өңірінің арғы-бергі тарихына, белгілі тұлғаларының өмір жолына, бүгінгі тыныс-тіршілігіне қатысты өлең-жырлары, поэмалары енгізіліп отыр.

Жандарбеков Болат. Сақтар: тарихи роман-дилогия / Болат Жандарбеков; (ауд.Т.Жақып).- Астана: Фолиант, 2024.-820 бет.
  «Сақтар» дилогиясының бірінші кітабы - «Томирис патшайым» тарихи романы біздің дәуірімізге дейінгі VI ғасырдағы қазіргі Қазақстан аумағын мекендеген көшпенді тайпаларға, яғни бағзы ата-бабаларымызға билік жүргізген Томирис патшайымның қаһармандық тағдыры туралы әңгімелейді. Біздің жыл санауымызға дейінгі 530 жылдары Отанымыздың шеткі аймақтарына әу баста бүкіл әлемді жаулап алу секілді есірік пиғыл ұстанған парсы падишасы Кир баса-көктеп кіреді. Қырғын ұрыс кезінде еркіндік сүйгіш көшпенді тайпалардың бостандығына қатер төндірген қанқұйлы жатжұрттық басқыншыны Томирис патшайым ойсырата жеңеді. «Сақтар» дилогиясының екінші кітабы - «Шырақ батыр» тарихи романында сақ еліне шапқыншылық жасауға тәуекел еткен тағы бір парсы патшасы Дарийдің қалың қолын шөл далаға айламен ертіп апарып, қырғынға ұшыратқан Шырақ батырдың асқан ерлігі, сондай-ақ Томирис патшайым өмірінің ақырғы кезеңі, сол дәуірдегі көшпенділер даласын қанға бөктірген шытырман саяси оқиғалар алға тартылады.

Жақсылық Әлихан. Ескі вокзалдың жолаушылары: роман/ Әлихан Жақсылық.-Алматы: «Қазақстан Жазушылар одағы» РҚБ, 2024.- 312 6ет.
  «Ескі вокзалдың жолаушылары» атты роман қазіргі ахуалды, әсіресе көпшіліктің арзан, жеңіл дүниеге ұрынғанын, автор бұнысымен бір ғана адамның емес, күллі адамзаттың ғаламторға қамалғанын айтады. Яғни шығарма біздің қоғамдық сана, сіз бен біз туралы.

Бопайұлы Болат. Қазақ ырым-ғұрыптары. - Астана: Фолиант, 2024. - 64 бет.- (Қазақ қазынасы).
  Ұлтымыздың ырым-ғұрыптары -көнеден келе жатқан асыл мұра. Оның әрқайсысында терең мән жатыр. Адамды ұл- кен-кіші деп бөлмей, ішкен асы мен басқан тасына дейін - бәрін бірдей құрметтеп-қастерлеген халқымыздың даналығы осы ырым-ғұрыптарымыздан байқалады. Адам баласының дүниеге келіп, бақилық болғанына дейінгі барлық ырым-ғұрыптар осы кітапта жинақталған.

Бопайұлы Болат. Қазақ дастарханы- Астана: Фолиант, 2024. -76 6ет.- (Қазақ қазынасы).
  Қазақ үшін берекенің қаймағы - ақ дастархан. Таспен ұрғанды аспен ұратын еліміз дастархан басында маңызды мәселелерді шешеді, әулетімен жиналады, қуанышын тойлайды, қайғысын да бөліседі. Халқымыз қонаққа берілетін асты жөн-жосығымен ұсынған. Бұл кітапта дастарханға қойылатын әр тағамның мән- маңызы, жалпы ас-тұзға қатысты жоралғылар айтылады.

Бопайұлы Болат. Қазақ дәстүрлері - Астана : Фолиант, 2024.- 84 бет.-(Қазақ қазынасы).
  Қазақ- қазақ болғалы алмағайып кезеңдерді бастан кешірсе де, салты мен дәстүрін ұмытпаған халық. Ұлтымыздың әр дәстүрінде терең тағылым, мол тәрбие жатыр. Ал кейінгі ұрпақ сол ата-бабамыз салған сара жолмен жүріп, ғасырлар бойы сақталған үлгі-өнегені бойына сіңірсе, ұлтымыздың болашағы айқын, ғұмыры ұзақ болмақ. Бұл кітапта халқымыздың салт- дәстүрлері жинақталған.

Ыбырайымұлы Әділбек. Күнге бет алған керуен.Жыр кітабы/ Әділбек Ыбырайымұлы. - Алматы: ЖШС РПБК «Дәуір», 2023. - 520 бет.
  Белгілі ақын, Халықаралық «Алаш» әдеби сыйлығының лауреаты Әділбек Ыбырайымұлының бұл - «Күнге бет алған керуен» жыр жинағы лирикаға бай, эпикалық сарынға да арқа сүйеген, азаматтық үнге ие. Өлеңдердегі айшықты суреттер мен бейнелі теңеулер, табиғат, жаратылыс тылсымдарымен астарлас түйінделетін пайымды ойлар мен тың тұжырымдар еріксіз көңілді иітеді. Шығармалардың шынайылық қуаты мен өресіне тұшына отырып, оқырманын ой тұңғиығына шомдырады.Әртүрлі жаратылыс құбылыстарын, жансыз нәрселерді адам кейпіне келтіріп немесе қалайда жан бітіргендей етіп суреттейтін көркемдік әдіс- тәсілдерді ұтымды қолданады.Сондай-ақ, ондағы тақырып алуандығы бірден байқалады. Әрі, тізбектелген бөлімдер - керуендегі шұбақталған жампоздарды көзге әкеледі. Автордың тілі бай әрі ұлттық бояуға қанық.

Айзада Рахымжанова Алтын тамыр- Алматы: «Алматы-Болашақ» АҚ, 2023. - 136 бет.
  Айзада Бүркітқызы Рахымжанова- 1991 жылы 5 сәуірде Қарағанды облысы, Жаңаарқа ауданы, Ақтау ауылында дүниеге келген. Е. Бөкетов атындағы Қарағанды мемлекеттік университетінің түлегі. Ақын есімі бүгінде оқырман қауымға кеңінен таныс. Қарағандыда дәстүрлі түрде ұйымдастырылатын Жұмабек Тәшенов атындағы «Жылдың үздік ақыны» байқауының жеңімпазы. Автордың 2017 жылы жырық көрген «Меруерт моншақ» атты жыр кітабын көпшілік қауым өте жылы қабылдады. Қолыңызға тиіп отырған «Алтын тамыр» өлеңдер жинағы да жыр сүйер қауымды баурап алары анық. Ақынның сұлулыққа, іңкәрлікке, ізгілікке толы жыр жолдары көзіқарақты оқырманның лайықты бағасын алады деген сенімдеміз.

Айдабосын Есболат. Қасқыр ішік: Әңгімелер мен хикаяттар. - Алматы: «Керемет медиа», 2024. - 240 бет.
  Жазушы Есболат Айдабосын жетісулық өнерпаздар тақырыбына қалам тартып жүр. Жетісу күй мектебінің қос діңгегі Байсерке мен Қожекенің қилы тағдыры жайлы хикаят жазған автор Кенен Әзірбаевтың балалық шағы туралы «Бозторғай шырылы» деген туындыны өмірге әкелді. Бұл кітапқа осы үш хикаят та еніп отыр. Сонымен бірге жазушының соңғы жылдары жазған бірнеше әңгімесі мен эсселері топтастырылды. Әр шығарманың стилі бөлек, мазмұны бай, тілі шұрайлы.

Айғалиев Ертай. Ажал аралының тұтқыны.- Алматы: ЖШС РПБК «Дәуір», 2024 . - 424 бет.
  Автордың бұл жинағына -«Ажал Аралының тұтқыны» атты хикаяты мен «Сарайшық ханшасы және Иван Грозный» қос арналы тарихи романы еніп отыр. Екі шығарма желісінде де шытырман оқиғалар, тарихи-танымдық тұрғыда айтылған мәселелер, ата-бабаларымыздың елін, жерін қорғаудағы жанқиярлық ерліктері мен тәуелсіздігіміз кезіндегі бүкіл өмір тынысы нанымды суреттелеген.Кітаптың балаларға, жасөспірімдерге отаншылдық тәрбие берудегі маңызы зор.